Milante milante e milante…

A vevin viazât par milante e milante agns, milante e milante agns e agnorums, secula et seculorum, milenis e milenis. La cosmonâf INFINÎT, une colonie di abitants de Tiere, e jere partide par rivâ al limit extrem dal Univiers a 13 miliarts di agns-lûs. A lis gjenerazions si succedevin lis gjenerazions par miârs e miârs e n di voltis… Cul passâ dai milions di agns l’om al jere xò cambiât: al veve un grant cjavon dut çurviel e nome doi dêts par ogni man par cjalcjâ botons intant che lis gjambis si jerin trasformadis in smunçuis; no i coventavin: par movisi al doprave une cjadreute/hovercraft sospindude par aiar!
I milenis a passavin, la ete dal om si jere slungjade come ke di matusalem, gnûfs humans a nassevin nome cul procediment de clonazion. No si podeve fermâsi a esplorâ stelis e planets; si scugnive lâ indenant fin al limit ultin e dopo altris milions di agns ve che si sorpassà l’ultin systeme planetari, la ultime particule di polvar, l’ultin atom di gas e dopo il Vueit Heterni, ma intant la umanitât e jere cambiade, vint trasferide la memorie di chei cjavons dut çurviel dentri robots une vore sofisticâts. I cjavons dut çurviel a jerin stâts distruts! E dopo altris milions di agns di Vueit Heterni a vioderin lis vanguardiis di un gnûf Univiers!!! Si infondarin tune gnove cise di galassiis! Si jerin alore fats la idee che l’Univiers di dulà che a vignivin al fos come une grande bufule, dopo al vignive il vueit abissâl e dopo une altre bufule-univiers, chê inte cuâl a jerin pene jentrâts! Viazant altris milions di agns tal gnûf univiers si trasformarin ancjemò trasferint la lôr memorie intune gnove entitât: no plui ròbots ma une sorte di fumatute verde pensante… ve la gnove umanitât… pinsîrs fissâts in particulis di fumate verde! Si continuà la esplorazion ma aromai la cosmonâf no coventave plui: la fumate post-umane pensante si ingrandì simpri plui, aumentant la masse tirantle vie a lis stelis dulintor. La fumate e oreve savê, e oreve cognossi lis veris dimensions di chel secont Univiers. E alore e robà i rais des stelis e si ingrandì ancjemò ancjemò e ancjemò cjapant dute la energjie disponibile! Vele la fumate-ment post-umane, e veve tocjât aromai lis dimensions dal secont univiers e e continuave a aumentâ!!!!!!!!!!!!!!!!!!!