Adiriture! Ben po, graciis! Ma da rest, cuntune cjante come La canzone di Tom, no podeve no vignî fûr che…
Onde Furlane + Contecurte = ONDE CURTE
Vuê us dìn une gnove, che nus interesse di dongje e che cence dubi e je il progjet plui interessant di chest 2012, par la nestre Ostarie.
Cualchidun, chei che magari la matine a scoltin radio Onde furlane, forsit a savaràn bielzà cheste gnove, altris la scuvierzaran cumò, dut câs, o sin une vore contents di podêus dî che Contecurte e je rivade fintremai ae radio.
Sì! O vês capît ben… cualchidune des nestris contis e sarà lete a radio Onde Furlane.
ONDE CURTE, si clame cheste gnove, piçule trasmission di Onde Furlane, che e à tirât dentri la nestre Ostarie.
Il progjet, nât aromai cuasi doi agns fa, al jere stât metût adun cu la selezion di cincuante contis di chê che o podìn clamâ la prime stagjon di Contecurte, cuant che, disìn, il blog al jere ancjemò su Splinder e a zirave, forsit, un pocje plui di int, tor pe nestre ostarie. Dopo, al jere lât intal camarin, par un pôc, ma cheste primevere, come un vin di chei ben stagjonâts, lu vin tornât a tirâ fûr e vin finît di preparâlu, par podê servîlu ai scoltadôrs de Radio, sui 900Mhz dal FM.
La idee, vignude fûr di cualchi cjacarade fate dal ostîr insieme a un contecurtâr radiofonic come Carli Pup, e je chê di viodi se lis contis curtis a cjatin bon stâ in radio, come une sorte di pirule leterarie cuotidiane.
Ve chi alore qualchi informazion in plui, cjolte drete dal comunicât de radio:
Aida Talliente, adun cun Raffaele Serafini (scritôr di narative, un dai creadôrs dal blog di Contecurte e editorinte redazion di Edizioni XII), Francesco Tami (scritôr e musicist, l’unic a vê vinçût Premi S. Simon, concors par senegjaturis in lenghe furlane dal CEC, e Premi Friûl) e Barbara Minen (colaboradore di Onde Furlane che zaromai di agns e cure la trasmission di leturis “La ore dal te”) a son po lis vôs di “Onde Curte”, un program che al partìs de esperience dal blog leterari “Contecurte”. La trasmission e larà in onde ogni dì, dal lunis al vinars, tor 8 e un cuart di buinore (dopo dal GR e dal meteo), a partî dai 23 di Avrîl. Ogni pontade e previôt la leture di une des contis curtis – cun gjenars che a van dal horror al romantic, dal sociâl al ironic – publicadis sul blog di autôrs zovins za cognossûts (tant che Maurizio Mattiuzza o i stes Serafini e Tami), ma ancje esordients. Un tant par fâ cognossi la gnove leterature furlane, ma ancje cun chê di invoiâ a scrivi par furlan.
Buine scolte a ducj!
5 comments
Lasse une rispueste
Dutis lis contis
biele le iniziative
ma parcè no metile jù ancje in “streaming”
par chei di difûr che le onde no ur rive
e po ancje e podaressin scoltâle (ducj) cuant che ur va miôr
el fari
la domande e larès fate a che de radio, ma mi pareve che radio onde furlane si podès scoltâ cence fastidi, di internet.
Baste lâ sul sît de radio e a son i leams.
Daspô se in streaming tu intindis di podê sintilis, a comant, chest propit al va domandât a lôr 🙂
La idee da "el fari" di metile in streaming mi par interessante. Il probleme di scoltâ in direte al è il fûs orari, par esempli: ancje se a Buenos Aires o podin sintî Radio Onde Furlane par Internet, lis 8 e un cuart di buinore vuestris a son lis 3 e un cuart di buinore nestris, a chês oris alì o sin tai braçs di Morfeu. Un salût. Galliano
O crôt che il streaming al esist bielzà da un biel pôc par chei che no lu savessin. Sule emission des contis curtis jo no sai cemût che il program a nol é nassût prime, massime che da cuant che a son stâts tajâts i sussidis, Onde Furlane a cirive di tirâ indenant cun ce che a podeve.Ma miôr al vâl tart che mai.
Un altri program che al sarès da fâ e che al varès un grum di sucès al sarès chel di: "Cemût si disial par furlan"
Al puedarès sei fat come un zuc, indulà che cualchi invidàt al rispuindarès le proprie rispueste magari umoristiche o ironiche o verosimil ma che il condutôr de emission par finî al varès di mendâ e rivelâ le vere peraule furlane.