Cemût si disial par furlan? Narciso, tarassaco, fiordaliso

Ve chi, al plôf e al plovarà, in chescj dîs, ma o sin istes in stagjon di Vierte, e alore la rubriche dal “Cemût si disial” e va indevant cun altris trê rosis, che magari cuissà, no savìn simpri cemût che si disin par furlan.

Narciso

Comencin cul narciso, sì, flôr che al cjape il non dal grec e si riferis al so odôr, une vore fuart, che al inçussis. Podopo, sigûr, forsit e ven tal cjâf prin la figure mitologjiche, che aromai e a rivât a fâ deventâ il sostantîf un agjetîf, ma a no nus interesse come che si dîs par furlan, il nomenât daffodil di Wordsworth. Ben po, il narciso e je la TARCETE e ve chi in bande un biel plet di tarcetis. E mi racomandi che no us vegni tal cjâf di dîsi a un che si cjale simpri tal spieli che al è une tarcete, eh… in chel câs, al è un narcîs!

Tarassaco

E o nin indenant cuntune rose che no profume di sigûr come lis tarcetis, ma anzit, e puce un pôc e ducj chei che a sedin stâts piçui e a zuiâ pai prâts a san ben che e ha un savôr une vore mareôs. Il tarassaco, o dente di leone o soffione par talian, che forsit tancj a clamin LATE o TALATE, e che a fâs lis rosis zalis che ben a cognossin, e che a chi nus plâs clamâ di plui PISSECJAN, non une vore colorît. Cualchidun, podopo, magari lu clame len di cjan, o tale dal boton, o magari cuissà. voaltris contecurtârs an savês altris…

Fiordaliso

E sierìn cuntune rose che cumò no je ancjemò in stagjon, ma che ancje plui indenant, purtrop, e stâ planc planc lant vie, di framieç i nestris cjamps di forment. O cjacarìn dal fiordaliso, che o vês za viodût chi in bande e che par furlan si dîs BARBURICE e che e je une dês pocjis rosis blu par nature.

1 comments On Cemût si disial par furlan? Narciso, tarassaco, fiordaliso

Leave a reply:

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît