Il cano(cjâl)

“Sêtu za stade in bancje?” gjo, a mê mari, tal viodile tornâ daurman.
“Nol ere nancje un cano!” disè jê.
“Cjan” gjo, “e par talian, cane.”
“Cano, sâtu parcè?” disè jê.
“Lu sai a memorie” gjo.
“Puar Agnul!” disè jê, tacant a contâ la storie di cuant che, la sere in sierade, ducj insieme cu lis fameis par dongje, si discartossave te arie la blave subit tirade jù, sentâts in file sul grum a man a man plui piçul de blave di discartossâ, denant dal grum a planc a planc plui grant de blave rosse o blancje scartossade, tun legri svoletâ par aiar, di un grum al altri, di panolis e peraulis de int, dute intun contâsi.
“Cemût, Ivano, chê dal cano cano?” mi diseve ogni moment Agnul Medêç, pari di Meni da la glace nomenât di dut Udin par vie che al puartave la glace tes casselis tai reparts dal ospedâl, in agns che no esistevin glacerots di ogni bande.
O vevi començât asilo juste in chel, sot des muiniis tun furmiâr di fruts e la superiore suor Giacinta che nus insegnave filistocjis, vuadolant ben e no mâl cui che al tardave a imparâlis.
“Queste son le mie manine” o començavi alore jo cun tante di ande sul grum de blave, zirulant lis mans denant di Agnul, “presto via non ci son più.”
“Questo è il lungo cano cano” cu lis mans a canocjâl denant i voi, “che si vede da lontano, presto via non ci son più!” platant lis mans daûr il cûl.
E Agnul Medêç, ogni volte, si consolave a ridi.
“Cemût chê dal cano cano?” al tornave a domandâ.
“Questo è il lungo cano cano che si vede da lontano…” jo, pontant il canocjâl cu lis manutis, che tun canocjâl fat cu lis mans un frutut al viôt robonis.