Tal curtîl, platât intun cjanton, al è un armelinâr in flôr. Al à la etât de cjase, su la cincuantine, che a son anons, tratantsi di un armelinâr.
Al è un misteri ce maniere che al rive adore a rezi la ramaçade cun dut il so fueam, massime tai burlaçs e aiarons estîfs.
Il tronc al è dut carulît, scjarnât, çondar, roseât di bestiis e timpessis, scunît e puartât vie dai agns, che si ten sù dome cu la scusse. Ma al è florît distès, tal so cjanton.
“Sêtu, Beput!” jo i dîs al armelinâr, passant par li, tal viodilu content che al cjale adalt.
Beput Cinisiti al jere un paisan, achì, piçul, suiât ancje lui dai agns, atîf, pront tal tignî cont dutis lis piçulecis de vite, capitadis par intop sot man, e gjoldi il lôr savôr fin l’ultime gote di vitalitât, come tun bussulut di sgnape che lui al produseve di scuindon te arie.
Mê agne Taresine lu veve clamât, un dopomisdì, a puartâi cjase di campagne un cjaruç di fassuts di lens. Alore, cumò, Beput al è su la tiezie che ju met in tasse. Sul cjar, mê agne Taresine jai da sù a mê mari su la trombe e mê mari jai da sù a Beput Cinisiti intent a intassâju su la tiezie.
Ma cenolè, juste cuant che ju veve ducj intassâts, a vore finide, no si sdrumie la tasse parsore di Beput, picinin, minût, scarmulin, sapulît sot i fassuts, che nissun lu cjate, nissun lu viôt, e mê mari e agne Taresine lu dan, dit e fat, par muart.
“Bepo, sêtu fat mâl?” e dîs une, dute vaiulinte.
“Beput, dulà sêtu?” e dîs chê altre, te disperazion.
“Clamaitlu Cinisiti!” e dîs intal curtîl une sô gneçute, puartade daûr par companie.
“Al è muart Bepo!” a berlin alore mê agne Taresine e mê mari, une sul cjaruç e chê altre su la trombe.
“Cuâl Bepo?” e dîs une femine, passant pe strade.
“Cinisiti, po!” a vosin lôr.
In chel, si viôt a movisi un fassut e vignî fûr, biel planc, la muse di Beput.
“Dulà ise la mê barete?” dissal lui, che al veve pierdude la barete inienfri i lens e lôr dôs àn scugnût fâ passâ dute la tasse, par cjatâje.
Darest, nol veve nancje une sgrassade e, pacjific, al à fate tal curtîl une pipade.
“Ten dûr, Beput!” jo i dîs al armelinâr, passant par li, tal viodi lis sôs rosutis cjalâ dutis contentis il soreli, cu la bocje vierte.
di Ivano Urli
#198
1 comments On Beput Cinisiti
O ai dit che mi plâs, Nelo, ancje se le storie a ie, secont mê, masse catastrofiche tâl finâl che al a di vê une sperance che il mont al vadi indenant. Se o vessin podût determinâsi in mût diferent, tal ultin secul, di sigûr cumò, o saressin sistemâts ben e no mal.
La int e varès fat plui fiis, forsit une piçule Svuizare. No saressin finîs tal slondar dal debit public; un numar che si prove vergogne a nomenâlu, tant a le grant! In ogni câs une sigurece je lassin ai fîs e ai nevôts, un debit par ogni un, no jal gjave nissun!
Pal bon Nadâl a le adore, si sintin plui indenant! Pal moment un mandi di cûr… Maurizio Di Fant