Sante

Insome a jerin chei biei timps là, agns ‘70, intune dì cuntun cîl celest cu lis montagnis che ti pâr di tocjâlis, intune domenie di cjampanis che a sunin e di “A come agricoltura” cun “Greensleeves” come sigle su lis imagjinis di un om che al arave… insome, intune zornade cussì biele al rivà a Selvucis li di gno nono un strani vagabont. Al à une vecje biciclete rusine, di chês dai bersalîrs, cu lis gomis plenis. Daûr al jere tacât un cjaruç cun parsore pocjis robis: un materassat fat sù, cuatri peçotats e un pâr di gamelins plens di ont.
Chest Sante al domandave a gno nono di fâi di famei e di sistemâsi a durmî magari te stale. Gno nono, cussì bon, i disè di sì.
Nol è che Sante nol lavoràs, ma ogni tant dal camarin al sparive cualchi salam e lis damigjanis, un pôc a la volte, si disvuedavin. Cussì gno nono, insuspietît, si stufà e al mandà vie Sante.
No lu vessial mai fat! Di un moment a chel altri lis vacjis a tacarin a inmalâsi… di mastite… cussì la Adue, la Rome, la Pome e la Galande. Si clamà il veterinari ma no si rivà a cumbinâ nuie tal arc di diviersis setemanis.
Il nono alore al decidè di tornâ a clamâ Sante parcè che lu saveve brâf… ducj a disevin che al jere un grant espert di bestiis. Bon. Alore Sante al tornà ma il nono al veve sierât il camarin cuntun luchet grues e si partave simpri ator lis clâfs.
Nie di fâ però. Lis vacjis a vuarivin ma i salams a sparivin e il vin al diminuive. Une sere gno nono si metè di vuardie propit dentri tal camarin, platât tun caratel; si jere fat sierâ a clâf de none.
Al spietà.
La lune plene e filtrave di une barconete garantint un fregul di lûs.
Di une buse tal mûr e jentrà une suriute che, tra la maravee di gno nono, e montà sù, lant a finî parsore di chei luncs lens che a sostegnin i salams; e roseà un spali fasint colâ un biel salam e po e saltà jù par mangjâlu. In pôc timp la rosse cjar e stave sparint te panze de suriute, come par une magjie! La besteute si bagnà ancje il musìc intal merlot dopo vê roseât ancje il tapon di suro!
Alore gno nono al saltà fûr dal caratel e al tirà cuintri de surie un dai siei pesants mulots.
Colpide in plen e sfracaiade: gno nono al veve buine smicje.
Ma… Sante?
Il strani om al sparì come par incjant de cjase dai vons. Nissun al savè plui nuie di lui. Al lassà a Selvucis ducj i siei (puars) bens…
di Checo Tam
#183

Leave a reply:

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît