Aes sîs simpri di chê matine Neil al le dongje de jentrade de General Specifix su la Prime Mediane. Al cjapà l’assensôr di veri, doprant la sô cjarte di identitât gruesse su la puarte di GE-PRO-9 […].
Al le dret te stanzie dal CU e al ativà il colegament cul visôr ros dal controlôr. Al batè il so non e il codiç di cuarantesiet cifris, al poià la palme de man e al tacà la ricercje. Si fermà dome cuant che e comparì la sô documentazion. Nol saveve se al coventàs cualchi codiç speciâl par alterâ la DPI, la documentazion permanente dal impleât. Al jere conturbât, di pôre che lis vuardiis de sigurece armadis a saltassin fûr di une puarte scuindude e lu strissinassin vie in preson cence nancje un procès […].
Po dopo il soreli al tacà a jevâ di daûr dal profîl di Brooklyn.
Cu la lûs e rivà la sensazion dal spazi. Neil al cjalà la citât e dopo al scancelà lis marchis D di imbast e mancjance di concentrazion. Nol capità nie. Cuant che al eliminà i contignûts dal box de diagnosi il licenziament proponût al discomparì in automatic e il Visôr di Penalitât al fo sostituît cuntun Visôr di Merit colôr aghe. Culì Neil al scrivè che al veve palesade grande abilitât e che al jere stât promovût al setim nivel […].
Neil al metè dentri la sô DPI inzornade tal database permanent de General Specifix. Lu cjapà une sensazion di grande calme. Al fasè fieste vierzint un model gnûf di chip. Al veve decidût di creâ un gnûf chip par trasmeti e par ricevi dâts fra un argagn che ancjemò nol esisteve e il cerviel. Nol veve mai creât prime un chip in grât di processâ. Ae scuele dai prod i vevin insegnât che dome un prod cun cinc agns di specializazion dopo dai studis al veve la capacitât di codificâ i milions, a voltis miliarts, di istruzions binariis par otignî une funzion indipendente.
Ma Neil al veve imparât che i programadôrs logjics principâi a vevin disvilupât un database badiâl di sotprograms che al veve centenârs di milions di regjistrazions categorizadis daûr de funzion, de velocitât e de compatibilitât cun altris sotprograms. Neil al veve dome di pensâ a une funzion e dopo domandâ al sisteme di cirî in base ai siei parametris.
Chest sisteme […] al jere stât disvilupât sul imprin par un ûs gjeneric de HI, Hackers International, ma dopo al jere stât cooptât de MacroCode Corporation tal cors di une evenience pôc gustose avignude viers la fin da agns dîs dal XXI secul. Chest database, un segret tignût cun gjelosie, al vignive inzornât ogni ore cun logjichis creadis dentri de imprese, compradis difûr, o ben robadis.
Ogni regjistrazion dal sisteme e veve colegade a se une liste di aparâts hardware pusibii. A traviers di cheste liste Neil al jere sigûr di rivâ a cjatâ fûr il materiâl plui bon pal progjet dal Tierç Voli […].
«Mandi, piçul» i disè Nina, che e jere vignude a cjatâlu dopodimisdì sul tart, te sô stazion di lavôr. «Cemût vaie?»
«Benon. No podarès lâ miôr.»
«Stâstu lavorant ben?»
«Ae fin o ai capît, Nina.»
«Ce robe?»
«Chest al è dut ce che o ai. No podarès tornâ a LAIVE-AITCH nancje se mal permetessin. No podarès stâ li a clamâ protocoi o regjistradôrs segnetimp. No podarès jevâ aes siet e lâ a durmî aes dîs di sere. No podarès vivi cence di te.»
[…]
«O sai che no soi biele» e disè jê.
«No sta dîlu» al rispuindè lui. «No sta dî nie, dome che tu vuelis viodimi ancjemò, ancje se o soi un stupit, un pote dai borgats.»
Nina lu bussà su la bocje, une infrazion che e previodeve il licenziament a sec, e si voltà di buride, tornant al so lavôr.
«No sta dîlu» al rispuindè lui. «No sta dî nie, dome che tu vuelis viodimi ancjemò, ancje se o soi un stupit, un pote dai borgats.»
Nina lu bussà su la bocje, une infrazion che e previodeve il licenziament a sec, e si voltà di buride, tornant al so lavôr.
Sielte e voltade par furlan
Dal Garzon de Ostarie
8 comments On La conte misteriose (15): Il tierç voli
cuissà se i doi "mah" a son par l'autôr misteriôs o par la traduzion dal nestri garzon 🙂
La traduzion dal garzon e je une vore interessant (come di che la lenghe, se si ul, e puess slargiassi in ogni camp) – dutcas, i doi "mah", secont me, e son da intindi che par voltà in furlan une cualsiasi storie no baste vè doi volis, ma al covente che il tradutor al sedi braf, tal e qual il garzon istess, ca l'à il tierc voli e lo use ben, anzi benissim!
Frank Spada
In nûf, par cumò, che an segnât "mi plâs". Cuissà ca nol sedi ancje Bill Clinton che, apassionât di leterature zale, al veve menzonât l'autôr come un dai siei preferîts.
Jo o sai ca si trate di un coscrit da me classe, il '52.
O soi Bill, mandi coscrite DmF, si viodin al prosim viaç, a le prosime ocasion co ven des tôs bandis par une conferençe!
Bill, no stâ imbroià, o sai ben che tu sôs plui vecjo di me.
Ti perdoni, stânt che tu sôs american, che tu scrivis cence la S dople e ancje la "conferençe" no jê propite scrite par furlan.
Sacrament, dame, no vevino dit co eri merican, no tu pratindarâs co scrivi come il miôr dai contecurtârs. Tu savarâs che la di nô a le dut un pôc postiç, no sin mica in Friûl! Vûstu co sedi vêr propite jo!
A ogni mût, ti amiri, ancje se in maniere anonime….. mandi anime biele…
Ce biel chel "mandi anime biele"!
Bill, cuant che si viodarìn o leiarìn insiemi in american "Futureland: Nine Stories of an Imminent World" di Walter Mosley, in particolâr la conte "En Masse" e cussì o viodarìn se galiot al sarà il libri…