IL PESSÂR

Tal borc di sot, just ducj i vinars cu la sô camionete al capità dongje il Pessâr e chês feminis a davin fûr di ogni curtîl. La compre e veve a cefâ scuasi simpri cuntun grop di sardis che, impanadis tal ûf e la farine di flôr, a finivin fritis e po su pe taule, magari dongje une raine di lidric cul poc.
A jerin tancj agns che si fermave puntuâl in tal borc e ancje lui, il me gjat al rivave cutin, par vuadagnâ, menant la code, la sô gulizion.
Velu! Cjapât e subite mangjât, po cun grant solaç si lecave il mustic.
Ma chê dì si jere fermât denant di une ruede. Il me tui, dut blanc, forsit albin, al jere sort e nol veve sintût che la camionete e leve indenant.
Jo lu ai cjatât dongje il puarton, il cjâf jù par tiere e zirât par sù, che al pareve durmî.
O jeri a pene tornât di scuele e nissun si jere visât che il tui al jere muart.
Nol varès saltât plui su la mê spale, ni covaçât mugnestri dongje i miei pîts, come che simpri al faseve di cuant che, propit li, dongje il puarton, la prime volte, cualchi an prime, cun grande maravee o si jerin cjatâts.
di Maurizio Di Fant

3 coments On IL PESSÂR

  • Come gjenar e ricuarde un pôc il Piçul Ream dal Spirt Anonim: un cuadri di memoriis ben piturât. Forsit si podeve zuiâle un pôc di plui su la dinamiche tension-sorprese, cussì e somee cori vie plane plane.
    Ancje se a cirî simpri l'efiet si pues lâ a pericul di vê il risultât contrari…

    il Camarîr

  • Gracie pe considerazion, Camarîr, o vevi pensât ancje jo di slungjâle un tic di plui, ma cul pensà di dopo a mi plâs cusì. La conte a fevele di un afiet di un frut e un piçul nemâl e l'afiet, a voltis, al po no finì mai! Ma par comprendi chest fat, bisugne lei ce che no le scrit!
    Maurizio Di Fant

  • Ce biel cuant che l'autôr al interven tai coments!
    Biele, sperin di leint ancjemò!

Scrîf un coment

This site uses Akismet to reduce spam. Learn how your comment data is processed.

Pît di Pagjine dal sît