TRAGEDIA SUL TORRE:PENSIONATO SCHIACCIATO DAL SUO PICK-UP

Al jere partît cul so pick-up plen di garbatui; i vevin dât 20 Euro par disvuedâ chê cantine. No propit tant ma almancul alc di sest al podeve tignîlu lui. Une biele lampade, dôs bielis damigjanis e cualchi cjadree a jerin cumò sistemadis cjase sô. Il rest, vecjos eletrodomestics, sacs di vistidats, une television a segnâl analogjic e altris catans a jerin tal casson dal pick-up; e vie… dulà?
Migo inte eco-plaçute? Masse rognis spietâ che e vierzi, mostrâ la tessare e dividi la robe sot i ordins di chel sfondrât vuardian. Cussì Feo al le dret dret tes boschetis de Tor, bande di une gjave di glerie. Ta chê sere di Istât al molà jù la robate intun grant prât e al cirì parfin di brusâ dut in mût maldiestri cul alcool. Nie di fâ, il fûc dopo un pôc si distudave.
«Mi soi stufât. Miôr tornâ cjase. E tache la partide usgnot».
Suntun ram li dongje une upupe si jere svicinade come a curiosâ, nancje che si domandàs ce che a fossin chês robis che Feo al cirive di brusâ. Il colp di voli, il confront cu la bielece dal ambient ator al jere trement: un paradîs violât!
«Ah, se o ves chi la mê la carabine ti varès za sistemade! O varès juste bisugne di un altri uciel imbalsamât…»
Cussì al disè Feo de upupe che intun marilamp e svolà vie. Po lui al tornà a meti in moto il pick-up par tornâ cjase, ma chiste volte al cjapà une stradele diferente, propit a ôr de grave dal turint. I temporalons di Jugn a vevin trasformât la Tor intal Nilo ma cumò dut si jere cuietât. No jere aghe nete ta chel trat ma dome un grant lâc neri di stomeose aghe di fogne che e vignive de citât: la mierde dai cagons di Udin. La stradele e franà cul pês dal pick-up, tant la Tor e veve roseât la rive! Il mieç si ribaltà cun Feo dentri. L’om al murì inneât intune aghe nere, plui nere dal Acheronte! Puar Feo. Ma ce puar… i sta ben!
di Checo Tam

7 coments On TRAGEDIA SUL TORRE:PENSIONATO SCHIACCIATO DAL SUO PICK-UP

  • Biele e vonde e il finâl propite chel just!
    Sarà nancje un mês co ai incaricât un om di metimi a puest ta lis rimessis. Al varà fat, cu la so Ape, almancul seis viaç fin inte eco-plaçute dal comun. O sin stâts a discuti su une vecje tanicute di diserbant (jo volevi liberâmi di je e lui a mi diseve di tignîle) parcè contrarie a chest tratament.
    Tal mio zardin, sul prât di jerbe naturâl, a son nassudis parfin lis orchideis, chês ca somein âfs o jespis ca jentrin dentri tal flôr.

    Velis:
    http://donebete.splinder.com/tag/orchideis

  • Questo commento è stato eliminato dall'autore.

  • Ops, une "upupe"… uciel cun referencis crepuscolâr, ma par furlan nol sarà mighe un "gjalut de biele creste", no mo?

    Il Camarîr

  • ahahah
    o vin fat propit dôs ridadis, cuant che o vin cjatât che si diseve "gjalut de biele creste"
    ma il Checo propit no la sopuartave
    chê definizion,
    e in efiets
    ancje a mi mi fâs ridi 😀

    a ogni mût
    biele conte

    🙂

  • Ridês fin che o vês voie, ma doman si becais une biele petenade dal camarîr! (che intant al è sot a rissiacuâ un pô' di bicjêrs e di forchetis…) 😉

    il Camarîr

  • Questo commento è stato eliminato dall'autore.

  • Se nô o fossin pardabon ma pardabon di marilenghe furlane (e no genocidizâts culturalmentri ;-D) sâstu ce ridadis che si fasaressin a sintî che i talians a clamin il gjalut de biele creste cuntun nom cussì stramp tant che "upupa"?

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di Pagjine dal sît