Par barbe Milio

Barbe Milio al jere un di chei furlans dal inizi dal secul passât che al veve cognossude la miserie. Chê miserie che e jemplave i curtîi e lis andronis dai paîs furlans, che ducj ben o mâl a spartivin cence bruntulâ masse; e jere chê la lôr vite, no ’nt cognossevin altris.
Ma lui, barbe Milio, no si sintive un di lôr, nol veve stabilît di puartâ indevant la tradizion di chê famee cussì umile, che e sbassave il cjâf parsore des cumieris, sot dal soreli. Lui al sintive di vê alc di plui, alc che i varès permetût di viodi ce che al jere lontan di chês stradis plenis di polvar.
Chê zornade di Istât, cjaminant pe vie da prât, cul so librut neri dut fruiât in man, al cjalave chel cîl cussì penç di soreli e al pensave a trop biel che al sarès stât il mont vie di li, a chei bogns cristians dal paîs che a vevin cerçât la fortune in puescj forescj… chei sì, che a varessin vivût passûts e contents cun dutis lis bielis robis che a varessin viodût!
Lu passarin, corint in bande su lis lôr bicicletis, doi frutins de sô etât, coionantlu “Milio, tu sês ben svelt tu a lassâ il lavôr su pe schene a chei altris! Pree il Signôr che ti fasi vignî un pocje di voie di lavorâ!”.
Lui al scoltave lis lôr cjoltis in zîr, ma no ur rispuindeve mai, tant che chei a vosavin inmò di plui par fâsi sintî di chel frutin solitari e cidin. Ma lui nol bacilave: ur varès ben fat viodi cuant che al fos lât vie di li, cui che al jere chel plui svelt.
Intant al cjaminave jù pe strade blancje, cun chel librut neri in man, chel che i veve regalât so pari e che lui al leieve, cjatant ispirazion e confuart tes peraulis dal Signôr.
Di bot e sclop al sintì une vôs, al inizi debile, come un murmui, po simpri plui fuarte: i pareve che chê vôs lu clamàs, sì, e diseve propit il so non. Si cjalà tor ator ma nol viodè nissun, crodint che a fossin lis canais di prime che i fasevin un dai lôr scherçs. Ma no, chê vôs e jere cussì biele, delicade, divine. E po chel cjalt, chel cîl simpri plui sflandorôs, chê atmosfere cuasi magjiche che al sintive ator di se… nol capive ce che i sucedeve, ma al sintì dome une grande fuarce che i sbregà des mans il so librut, fasintlu colâ par tiere.
In chel moment al capî che il so viaç al scomençave, un viaç lunc e faturôs, al servizi di un Paron che no i varès fat sbassâ il cjâf, se no par scoltâLu e par servîLu.
di Rosute
#156

9 comments On Par barbe Milio

  • O profitìn di chest prin coment par dâ il benvignût a Rosute, che e je la prime gnove jentrade di cuant che o vin viert la Gnove Ostarie e chest i fâs za onôr.
    Cun di plui, e je jentrade in ponte di pîts, ma o sperìn che prest e sedi za pronte par lâ indenant cu altris contis 🙂

    Benvignude Rosute!

  • Benvignude a Rosute
    Jaio

  • Questo commento è stato eliminato dall'autore.

  • Graciis pal benvignût!
    Ancje jo o speri di continuâ a bevi chest bon tai in ostarie! 🙂

    Rosute

  • Benvignude a Rosute!

    Une conte che, nancje a fâlu a pueste, e ven denant di dôs contis misteriosis (no lu san ancjemò nancje i parons, al è un scoop) dulà che si fevelarà propit di predis di paîs!

    E tu podaressis sei propit tu a induvinâlis, se… 😉

    Mandi

  • La conte, ancje se il teme tratat no mi dîs cuissà ce, da un pont di viste da la narazion mi plâs.
    O crôt che da la pene di Rosute a podaressin saltâ fûr contis a la maniere di Selma Lagerlöf. O stoi pensânt a une bielissime, lete di frute tal libri di leturis di cuinte di me sûr.
    Chel libri lu ai ancjemò e la conte le ai voltade par furlan tal mio blog
    http://donebete.splinder.com/tag/il+scri%C3%A7

  • Done Bete, ce complimenton!
    No crôt di meretâmi tant, ancje se ti ringracii!
    O cîr di fâ dal gno miôr tirant fûr ce che al dentri tal cûr, propit come in cheste conte che, tu varâs capît, e je detade dal sintiment viers di une persone.
    Bielon il toc dal petaròs, e scrit par furlan al mostre trop che cheste lenghe e pues jessi delicade tal descrivi i sintiments.
    Graciis.

  • In famee, de bande di gno pari, o vin vût diviers parincj che 'nd àn sintude la clamade (no par ducj o dutis e jè stade puartade indenant fin a la fin de lôr vite), ma cheste conte mi 'nd à cjapade un grum par la delicatece di contâ un moment cussì impuartant par une persone a ti cjare. Bielonone ancje la suaze des andronis, dai curtii, dal cîl, dal soreli, de strade blancje di ducj i paîs furlâns

  • Plasevul il to mud di presenta in scrit veretats dal secul pasat indula che vue masse spess e vegnin disfates intal acid de dismentie.Benvignude Rosute il plasè di leiti mi sarà simpri grant. Lussian

Leave a Reply to Dame mit Fächer Cancel Reply

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît