Gnot di Carnavâl

Par strade e jere ancjemò tante int. Al sucedeve da râr a chê ore di gnot. Almancul cussì e pensave, parcè che nancje jê e jere usade a movisi di straoris. Lis falis a butavin dulintor sflamiadis di lûs malsigure là che lis musis a parevin crepis rossis e neris. Cualchidun al leve ator mascarât e, tal trimulâ des flamis, chei tomâts di len, chei becs spiçâts, chei cuars arcâts a someavin vîfs.
Cence pôre dai bants, grups di contadins armâts a ziravin ancjemò pe citât cui simbui çambarlans ben in mostre. Lis ombris des pichis e des ronceis si slungjavin sui mûrs tant che madracs. I pareve che l’Unfier al ves tacât a spudâ fûr lis sôs creaturis.
I siei doi fradis a jerin denant, a vierzi la strade. La man drete a cjareçâ la spade. So cusin, invezit, al jere in code, a vuidâ il trop dai fameis. Dongje di jê a jerin so barbe e sô cusine. Si movevin svelts, tant che ombris tal scûr di chê gnot di Carnavâl. I pas a sunavin pesants sul concolât, compagnâts dal sglinghinâ des lamis. Chel sun le instupidive. Dut al jere strassomeât, ancje chei flocs ae strumiere che prin i someavin tant biei cumò a parevin maglâts, cuasi voluçâts di une ale rosse di sanc.
E veve il cjâf che i zirave. Forsit e veve balât masse. Forsit e veve olsât masse cul vin. Forsit a jerin stadis lis cjaladis di ducj chei zovins, che a brusavin come flame vive, come se e fos la ultime gnot che a podevin amâ une femine. O forsit a jerin dome i discors di chel Amaseo su lis costelazions negativis che a pesavin sui ultins dîs di Fevrâr.
La cjaminade i pareve cence fin. Dut chel inzirli le varès fate colâ se nol fos stât pal braç di so barbe. Po, cu la sô bocje scure tant che un foran, il porton dal palaç si veve vierzût. E fidave la ore di lâ sot des coltris, di durmî, di lassâ i vencui fûr de puarte. Doman, e veve pensât, si varès sveade ricreade. Doman e jere dì di fieste. E jere Joibe Grasse. Ce podevial mai sucedi di mâl intune zornade cussì?
di Carli Pup
#160

4 comments On Gnot di Carnavâl

  • Un spetacul di conte, Carli!

    Bravonon!

  • Sì, ancje a mi mi è plasude.
    Elegante. Une vore elegante.

  • Si, le conte a é ben scrite cence che sedi dificil di lei. Il merit al é ancje chel di vê fermât le conte juste prime di colâ in tal riviel dal dí dopo indulà che al sarès stât facil di cjatâ efiets zà scontâts, soredut che l'autôr al cognos plui che nô ducjce che al é sucedût.

  • Da la Joibe Grasse o crôt di vê sintût contà, par la prime volte, a une lezion tignude da Carli Pup a Palaçûl tal 2004. O vevi cjapât note ca no esist ta la tradizion popolâr parcè a si trate di fats soversîfs e che a son lis feminis che ju ripuartin, mentri che i oms a son restîf e che, invezit, a preferissin contà robis personâls, inerentis lis vueris mondiâls, il taramot …
    o speri di ripuartà alc di coret e se l'autôr al passarà in ostarie o varai gust di sintì se cussì a no je!

Leave a Reply to Dame mit Fächer Cancel Reply

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît