Intal gjalinâr de none a vivin trê bielis creaturis.
Checco al è il gjal, biel e boriôs, cu lis plumis slusintis colôr vert e maron e i barbois luncs e impiâts compagns de bore di fûc; al cjamine di lunc tant che un princip cjalant ator cui voi a ponte di spine, si sint il Re e al volarès jessilu pardabon par podê comandâ – lui al dîs- a chês stupidis di gjalinis.
Ma al à il piçul difiet di barbotâ che i impedìs di dî un chicchiricchì dut intîr: pûr cjapant flât si ingrope al chicchi. Lis gjalinis lu svilanin disint: «Su po Checco, sburte la peraule!»
Lui si invelegne e la creste i devente ancjemò plui rosse.
Catin e je la gjaline viere, si svante di jessi nassude a Majan e lu ripet simpri par fâ rabie a Minute e a Checco, che lôr a son nassûts a Glemone, alì di Marino.
Catin e je çuete, par vie che une dì, tal petâ un salt si è sfrente un pît. Checco la coione e la clame la modele, parcè che e sdrondene lis plumis daûr come chês fantacinis de television.
Minute e je la plui piçule, timide no olse nancje alçâ i vogluts, e à tantis plumis tenaris, e je tant di sestin.
Ven a stâi che vuê, subit daspò gotât, la jerbe dal prât di fûr e diseve: “Mangjimi mangjimi” e lis besteutis a vevin ben la aghe gole e a vierzevin il bec par lecâle.
Cun di plui un grum di viers a fasevin tarombulis tal ledanâr, une procession di golosets, un bocje ce vûstu di deventâ mats. No podevin plui di stâ cun chel torment.
Alore la none e à vierzût la puarte dal gjalinâr e lôr, sburtantsi e inçopedantsi a son saltadis fûr.
Checco al sgarfave sustât e nol voleve che Catin e Minute i robassin il puest da mangjative, Catin, dute invelegnade i à dit: «No sta fâ tant il malegraciôs parcè che chei compagns di te no an rivât adore a deventâ vieris, tu sâs che la parone e pues pensâ di metiti te fersorie, salacor cuant che al ven Nadâl».
Checco al è restât une vorone mâl e al à prometût aes dôs fantatis di deventâ plui mugnestri, vadì dome par slontanâ il suspiet di une brute fin.
Catin e Minute a cisicavin sot vie, Checco al jere sorepinsîr, ma il savê che: il bultric plen, il fen mulisit te grepie, un cop parsore il cjâf, la compagnie sot sere di chês dôs tabaiotis e il sierâ i voi savint che ancje doman e sarès stade la jerbute frescje a spietâlu, ve ca, dutis chestis sigurecis lu rinfrancjavin e cussì, plen di ricognossince, al veve provât a cjantâ. E robis di no crodi, i jere jessût il plui grant, il plui maestôs, il plui plen CHICCHIRICCHI che si sedi mai sintût tal borc.
Catin e Minute a vevin parfin lis lagrimis tai voi e a batevin lis plumis dutis savoltadis.
Cumò, cuant che al nas il soreli, Checco lu salude cuasi simpri cence barbotâ.
Chês dôs lu tratin cun rispiet, si strenzin dongje di lui su la scjalete, si vuelin ben: a san di jessi i parons espotics dal lôr mont centât.
di Giuliana Pellegrini
#153
#153
6 comments On Checco, Catin e Minute
Lis contis di Siore Giuliana a son simpri graciosis. Ma di cheste che à contât, non sa che Checco, une volte al mês, al scjampave dal gjalinâr pe buse de fereade, par la a Feagne a fassi curà dal miedi dai barbots. Lu ai viodût, jo, cui miei vôi.
Come simpri, Giuliana, un plasê lei lis tôs storiis!
Biele e baste, la conte! Si la lei dut un flât, come simpri cuant che si à devant ce che a scrîf Giuliana.
Biele e baste, la conte! Si la lei dut un flât, come simpri cuant che si à devant ce che a scrîf Giuliana.
Ce biel piçul mont creât da Gjuliane.
E à di sei une persone un grum delicade e gjentîl.
Cheste conte e je stade lete tal Sest Incuintri di "SERADIS DI LETURIS FURLANIS", che si davuelzè te Societât Furlane di Buenos Aires ai 18 di Otubar dal 2012.