Une batude silenziose

Chê sere – cuant che la interference e fo metude in sene – al cineforum a proietavin “La morte corre sul fiume” di Charles Laughton – l’unic film che al à viodût chest grant atôr daûr di une cineprese.

Drete a cjapâ puest par dutis dôs, Glorie, secuence daûr secuence, tignint lis mans tal grin e i voi leâts al visôr, e stâ a intrigâsi il cjâf une ore e mieze.

A pene fûr dal cine, jê e cor te ploie jentrant li di “Pierino il marinâr”, il so compagn, invezit, vignût denant sot une ombrene, si comode cun calme e al ordene: – Une cui sardons par me e une margherite – tacant subite a tabaiâ dal film cul peçot te vôs.

Il resonâ sui acjadiments metûts in lûs in blanc e neri, intun film noir incentrât su un predicjadôr incjantadôr cun lis aìnis tatuadis cun lis peraulis amôr e odi, e stramudà frontant il teme de sempiterne debolece feminîl e soredut de protagoniste: Shelley Winters, intal rodul di une mari, Willa Harper, vitime de rogance ambigue di un riverint, Harry Powell, impersonât di Robert Mitchum.

Glorie, imberdeantsi i pinsîrs, e strassomee i fats tant che ju volte tal personâl e lui, plui spazientît che acomodant, al tache a fevelâ dai siei impegns e, tant par straviâle, al fâs di mot a un pussibil weekend insiemit, preantle di sbassâ la vôs.

Cene finide: fûr al plûf che Diu la mande e jê, bacilant, e scomence a dî peraulis di une violence tâl, che lui, cirint di braçolâle, al tente di calmâle; i tabaie dai fastidis di lavôr, di une femine che… al dîs che il timp lu liberarà di un vincul; iludintsi di imbroiâle inmò.

Glorie lu implore sclarint lis sôs resons e lui s’invelenìs tant che al slungje vie une man pe… Un lamp, e jê e viôt il scûr riflès intai voi di chel om, la vanitât di une cjadene inesistent, di une fede che… Glorie si sint come une asole intermedie, mancjant, inframieç di une cjadene inesistent che e varès volût leâ distès cu la sô vite. Si svincole e, tratantlu cemût che al merete, e capìs che e à di pensâ dome a se stesse.

L’om al cor vie sgomant cul so coupé, e Glorie si met sot une tetoie, mutulide, a scorsenâ cu lis orelis: “O soi cierte, lu vuei, che là tu âs di lassâle!”, lis peraulis che i veve dite menaçantlu.

E torne a Cividât in tren – i lusôrs daûr de barconete, l’ingos tai labirints casuâi sul veri… rinunziâ a un frutut! Le condizion imponude a un amôr vivût framieç lis gjitis discuindon, in cualchi cjamare in Slovenie. Un amôr interpretât di Glorie intes spietis, magari cu lis cjastinis rustidis in man e il vin gnûf che i leave i dincj, lis bussadis tai androns al profum di Vierte, lis promessis ripetudis, nadânt intes aghis verdis dal Natison, inte ombrene, denant l’anfiteatri estîf de cjadene Zulie; il cineforum a Udin, d’Unvier, dome pe contentâ la sô passion pal cine d’autôr. Jê no voleve, jê… “no pôl jessi, Diu no lu varès permetût” e pensave lant viers cjase, passant dongje l’antighe puarte, dilunc il flum dal borc Brossana sunsurant pe plene, tignìntsi strente la sperance al inzirli di une batude silenziose, platade di James Agee, il senegjadôr, daûr di une secuence di chel film di Laughton – cuant che Glorie e tacâ la sô incredulitât a chê di Willa Harper, prime di svolâ jù tal Natison, daûr di une batude di un predicjadôr che veve tant amât.